Петропавл прокуратурасы жергілікті атқарушы органдардың халықтың әлеуметтік осал топтарына баспана беру туралы заңнамасын қаншалықты сақтайтынын тексерді, деп хабарлайды Qyzyljarnews.kz тілшісі.
Қадағалау органының мәліметінше, әлеуметтік осал топтағы адамдардың кезектен заңсыз алынып тасталғаны анықталды.
— «Тұрғын үй қатынастары туралы» заңға сәйкес мемлекеттік тұрғын үй қорынан пәтерге мұқтаж ретінде есепте тұрған азаматтарға баспана беріледі. Оған қол жеткізу үшін тұрғындар қажетті құжаттарын жинап, кезекке тұрады. Алайда, жергілікті атқарушы орган өкілдері тұрғын үй алу кезегінде тұрған ата-ана қамқорлығынсыз қалған және жетім балаларды заңсыз алып тастаған. Прокурорлардың ықпалымен 49 баланың кезегі қалпына келтірілді. Бұл мәселе – прокурорлардың жіті бақылауында,- деді прокуратура өкілдері.
Биыл Петропавлда 120 пәтердің кілті жетім балаларға берілуі тиіс.
Фото: ашық дереккөздерден
