Бүгін Сергеев су қоймасына мемлекеттік тапсырыс аясында 30 млн-нан астам балық дернәсілі жіберілді, деп хабарлайды Qyzyljarnews.kz тілшісі.
«Петропавл балық тәлімбағы» кәсіпорны биыл мемлекеттік тапсырыс аясында Сергеев және Петропавл су қоймаларына 35,5 млн сиг балықтарының дернәсілін жіберуі тиіс. Бүгін балық шаруашылығы инспекциясының өкілдері, жергілікті атқарушы билік органдары, балық шаруашылығы институтының және қауымдастықтың мамандарынан құралған арнайы комиссия алты ай бойы өсірілген балық дернәсілін қабылдап алды.
-Су қоймасына жіберілетін дернәсілдердің санына ғана емес, сапасына да мән береміз. Олар белгілі бір талаптарға сай болуы тиіс. Микроскоп арқылы көрдік, дернәсілдердің күйі жақсы, көлемдері сәйкес келеді. Енді олар автокөлікпен Сергеев су қоймасына жөнелтіледі. 30 млн дернәсіл су қоймасына жіберілуі тиіс. Міндетті түрде үш сағат ішінде жеткізу қажет, одан ұзақ уақытқа олар шыдамайды, — дейді «Есіл облысаралық бассейндік балық шаруашылығы инспекциясы» РММ басшысының орынбасары Марат Есімсейітов.
Сиг балығының дернәсілі инкубациялық цехтағы бассейндерде арнайы аппаратпен өсірілген. Су жәндіктеріне қолайлы жағдай жасалды. Мамандардың айтуынша, цехтың ішіндегі ауа температурасы + 1 градус, судың температурасы +6-7 градустан төмендемеуі тиіс. Ертең Петропавл су қоймасына сиг балығының 5 млн дернәсілі жіберілмек. Жалпы былтыр облыстағы су қоймаларына балықтың 44 млннан астам дернәсілі жіберілген еді.
