Химиядан 56-шы Халықаралық Менделеев олимпиадасында қазақстандық оқушылар 3 күміс және 5 қола медаль жеңіп алды, деп хабарлайды Qyzyljarnews.kz тілшісі, Қазақстан Республикасының Білім және ғылым министрлігінің баспасөз қызметіне сілтеме жасап.
Зияткерлік сайыстар мамырдың 9-ы мен 16-сы аралығында Ташкент қаласында өткізілді. Қазақстан құрамасы атынан Қарағанды, Ақтау, Нұр-Сұлтан, Өскемен, Павлодар және Ақтөбе қалаларынан 10 және 11 сыныптардың 12 оқушысы қатысты. Олар ТМД, Балтық және Оңтүстік-Шығыс Еуропа елдерінің оқушыларымен бақ сынасты.
-Өзбекстанда өткен Менделеев олимпиадасының жүлдегерлері қабылдау емтихандарын тапсырмай-ақ Ресейдің жетекші жоғары оқу орындарында тегін оқуға мүмкіндік алады. Ташкентке 2022 жылғы республикалық олимпиаданың жеңімпаздары мен жүлдегерлері барды. Сондай-ақ, олар бірнеше рет оқу-жаттығу жиындарында ең жоғары нәтиже көрсеткен олимпиадалық резервтің мүшелері,-дейді «Дарын» республикалық ғылыми-практикалық орталығының директоры Тимур Нұркешев.
Фото: ҚР БҒМ баспасөз қызметінен
