Солтүстік Қазақстан облысында пробация қызметі есепке алынған 25 жасқа дейінгі жігіттерге тергеу изоляторына экскурсия ұйымдастырды. Өйткені биыл тиісті талаптарды орындамағаны үшін 31 сотталған түрмеге отырғызылды, деп хабарлайды Qyzyljarnews.kz тілшісі.
СҚО бойынша қылмыстық-атқару жүйесінің ЕС-164/1 мекемесінде Петропавл қаласының пробация қызметінің есебінде тұрған сотталғандар мекеменің күн тәртібімен, тұру шарттарымен танысты.
-Бұл жігіттер бұрын бас бостандығынан айыру орындарында болмаған. Экскурсияның мақсаты – оларға талапты орындамаған жағдайда қайда келетіндерін көрсетіп, түсіндіру. Мұндай тәжірибені алғаш рет қолданып отырмыз. Бүгін 10 адамды алып келдік. Болашақта тоқсан сайын осындай іс-шара өткізуді жоспарлап отырмыз, — дейді Петропавл қалалық пробация қызметі бөлімінің бастығы Азамат Мәкенов.
СҚО бойынша қылмыстық-атқару жүйесі департаменті баспасөз қызметінің мәліметінше, биылғы 4 айдың ішінде 31 сотталушы талаптарды бұзғаны үшін бас бостандығынан айырылған. Былтыр осы себеппен пробация қызметінің есебінде тұрған 142 адамның жазасы қатаңдатылды.
-Пробация қызметіне бас бостандығынан айырылмаған сотталғандар есепке алынады. Олардың әрқайсысы заңмен көрсетілген белгілі бір талаптарды орындаулары қажет. Алайда жазасын өтеушілердің кейбірі соттың және пробация қызметінің талаптарын орындағысы келмейді. Кейбірі тіпті тығылып, қашпақ болады. Мұндайда сотталғандардың жазасы қатаңдатылып, бас бостандығынан айырылады, — дейді СҚО бойынша ҚАЖД бастығы Рустан Ахметжанов.
