СҚО-да жыл басынан бері 712 адам желшешекпен ауырған. Былтырғы жылмен салыстырғанда сырқаттанғандар саны 2,3 есе артты, деп хабарлайды Qyzyljarnews.kz тілшісі.
СҚО санитариялық-эпидемиологиялық бақылау департаменті баспасөз қызметінің мәліметінше, ауырғандардың басым бөлігі — 14 жасқа дейінгі балалар, яғни 635 жеткіншек желшешек жұқтырған.
-Желшешек – тыныс жолдары арқылы таралатын, дене қызуы көтеріліп, бөртпе шығатын жіті инфекциялық ауру. Вирус адамнан адамға жұғады. Сол үшін науқас басқаларымен байланысты азайтуы тиіс. Инкубациялық кезең 10-нан 21 күнге дейін созылады. Ауру басталғанда алдымен дене қызуы 39-40 градусқа дейін күрт көтеріліп, бас ауырады. Желшешек кезінде денеге бөртпе шығып, қышиды,-деді баспасөз қызметі.
Желшешекпен ауырғанда көбірек сұйықтық ішкен дұрыс. Егер ұйықтай алмасаңыз, парацетамолды қолдануға болады.
-Балаларда желшешек ересектерге қарағанда жеңіл өтеді. Желшешекпен ауырған адамдарда осы инфекцияға өмірлік иммунитет қалыптасады. Алайда, иммунитет әлсіз болса қайта инфекция жұқтыру қаупі бар,-деп хабарлады баспасөз қызметінің өкілдері.
Pexels иллюстрациялық фотосы
