Халықаралық музей күніне орай «Ботай пырағы — 2022» фестивалі өтті. Солтүстікқазақстандықтар Ботай тұрағында жиналып, тарихи орындарды аралады, деп хабарлайды Qyzyljarnews.kz тілшісі, Qyzyljartv-ға сілтеме жасап.
Тарихи мекен Петропавлдан 250 шақырым қашықта орналасқан. Ботай қонысы Қазақстанның ғана емес, әлемнің археологиясын дүр сілкіндіріп, тарихқа жаңа деректер әкелді.
— Тұрақтың ашылғанына 40 жылдай болды. Фестиваль 3-ші рет өткізіліп жатыр. 1983, 1990 және міне араға 30 жыл салып өткізілуде. Бұл жер мен үшін қасиетті. Ата-бабаларым осы жерді мекен еткен, мақтан тұтамын,-дейді Алматы қаласының тұрғыны Асанәлі Сұраған.
Осыдан 40 жыл бұрын археологтар Ботай тұрағы аумағынан жылқы сүйектерінің қалдықтарын, керамикалық ыдыстар мен тұрақтар тапқан. Жәдігерлердің бірінде қымыз ДНК-сы анықталған. Бұл сараптаманы даниялық зерттеушілер жасаған екен. Бұл бүкіл әлемге қазақтардың жылқыларды бірінші болып қолға үйреткендігін дәлелдеді.
— Бұл фестиваль арқылы Ботай қонысы жайлы жастарға айтып, оның қадыр-қасиетін түсіндіргіміз келді. Іс-шара барысында қатысушылар ботайлықтардың тұрмыс-тіршілігінің үлгісімен танысты. Сондай-ақ, тері мен керамикалық ыдыстарға және қазба жұмыстары болған жерлерде зерттеу жүргізіп, өздерін археолог маман ретінде сезіне алды,-деді Тарихи-мәдени мұраны қорғау және пайдалану орталығының директоры Рахат Мамбеталинов.
Фото: Sputnik / Елена Бережная
