Солтүстік Қазақстан облысы полиция департаменті баспасөз қызметінің мәліметінше, Егемен Қазақстан және Қазақстан Конституциясы көшелерінің қиылысында жолды белгіленбеген жерден кесіп өтпек болған 75 жастағы зейнеткерді «WorteX» скутері қағып кетті, деп хабарлайды Qyzyljarnews.kz тілшісі.
Анықталғандай, скутерді 16 жастағы студент тізгіндеген. Зардап шегуші медициналық мекемеге жеткізіліп, көмек көрсетілгеннен кейін үйіне жіберілді.
-Қала тұрғынына қатысты Әкімшілік құқық бұзушылық туралы кодексінің 615-бабы «Жаяу жүргiншiлердiң және жол жүрісіне өзге де қатысушылардың жол жүрісі қағидаларын бұзуы» бойынша хаттама толтырылды. Барлық жол қозғалысы қатысушыларын жолда жүру ережелерін қатаң сақтауға шақырамыз. Мәселен, жыл басынан облыс орталығында жаяу жүргіншілер мен жол жүрісіне өзге де қатысушылардың, оның ішінде велосипедшілердің, гироскутер, электр самокаттардың иелерін қоса алғанда 2 мыңға жуық жол қозғалысы ережесін бұзу дерегі тіркелді, — дейді Петропавл қалалық полиция басқармасы бастығының бірінші орынбасары Әлібек Ғабдуллин.
