«AMANAT» партиясының Атқарушы хатшысы Асхат Оралов солтүстікқазақстандық аграрийлермен, зиялы қауым өкілдерімен, партияның бастауыш ұйымы төрағаларымен және партия активімен кездесті, деп хабарлайды Qyzyljarnews.kz тілшісі.
Асхат Оралов Мағжан Жұмабаев ауданының Полудин ауылындағы сүт-тауар фермасында ауыл шаруашылығы тауарын өндірушілерімен кездесіп, конституциялық реформаның маңызын түсіндірді.
-Конституциялық реформа – «Жаңа Қазақстанды» құрудың нақты механизмі. Ата Заңымызда жер халықтың меншігі деп көрсетіледі. Бұл – өте маңызды қадам. Солтүстік Қазақстан облысында халықтың басым бөлігі ауыл шаруашылығымен айналысады. Сондықтан 5-маусым күні өтетін референдумға облыс тұрғындары белсене қатысады деген ойдамыз, – деді Асхат Оралов.
Шаруа қожалықтарының бірінің басшысы Алтынбек Сапаров тұрғындар ел дамуындағы жаңа кезеңді референдуммен байланыстыратынын атап өтті.
-Халық болып жатқан өзгерістерді көріп отыр. Тәуелсіздігімізді одан әрі нығайтып, елімізді дамыту үшін Конституцияға қажетті өзгерістер енгізуді қолдауға дайын, – деді Алтынбек Сапаров.
Сонымен қатар, Атқарушы хатшы өңірдің зиялы қауым өкілдерімен, партия, бастауыш партия ұйымдарының төрағаларымен кездесті.
Фото: «AMANAT» партиясының баспасөз қызметі
