Петропавлдағы Республикалық маңызы бар, халық арасында қалыңдық үйі ретінде танымал «көпес Янгуразовтың үйі» бірегей сәулет ескерткіші қайта қалпына келтіруді қажет етеді. Тиісті ғылыми-жобалық құжаттаманы әзірлеуге конкурс өткізу туралы хабарландыру мемлекеттік сатып алу сайтына орналастырылды, деп хабарлайды Qyzyljarnews.kz тілшісі.
Техникалық ерекшелікте тапсырыс беруші болып табылатын тарихи-мәдени мұраны қорғау және пайдалану жөніндегі орталық орындаушыдан Қазақстан Республикасы Мәдениет және спорт министрлігінің тарих және мәдениет ескерткіштеріне ғылыми-реставрациялау жұмыстарына мемлекеттік лицензиясының болуын талап еткен.
— Ғимарат ағаштан жасалған, сырты сыланып, әктелген. Ғимараттың негізгі қасбеті симметриялы, ою-өрнегі бар гипс қалыптары, ғимаратта үлкен дөңгелек терезелер бар. Астыңғы қабаты кірпіштен салынған. Интерьерлерде гипс қалыптары сақталған. Плиткамен қапталған екі пеш бар. Емен ағашынан жасалған есіктері сақталған, деп көрсетілген техникалық сипаттамада.
Ғылыми-жобалық құжаттаманы әзірлеуге 2,2 миллион теңге бөлінді. Қалпына келтіруге қанша қаражат қажет болатыны әлі белгісіз.
2013-2016 жылдары шатырды күрделі жөндеуге, кіре берісін қалпына келтіруге, қасбетті және ішкі үй-жайларды қалпына келтіруге 60 млн.теңге жұмсалды. Алайда, біраз уақыттан кейін олқылықтар пайда болғасын мердігер кемшіліктерді түзетті.
Былтыр наурыз айында қалыңдық үйі қайтадан шұғыл қалпына келтіруді қажет ететіні белгілі болды. 1998 жылдан бері мұсылмандардың діни басқармасының балансында тұрған ғимаратты мемлекет сатып алды. Қалпына келтірілгеннен кейін онда тарихи-мәдени мұраны қорғау және пайдалану жөніндегі орталық орналасады.
Мырзабай БЕЙСЕН
Фото ашық дереккөздерден.
