Маусымның 6-сы күні Петропавлда қос дөңгелекті көліктердің қатысуымен екі жол-көлік апаты орын алды, деп хабарлайды Qyzyljarnews.kz тілшісі.
6 маусым күні таңертең Набережная көшесінің бойында «Audi» маркалы көлігі мотоциклмен соқтығысып қалды. Салдарынан «Yamaha»-ның 34 жастағы жүргізушісі мен жолаушысы жедел жәрдеммен қаладағы медициналық мекемелердің біріне жеткізілді. Осы күні кешкі сағат 7-де Потанин көшесінде «Renault Duster» көлігін басқарып келе жатқан жүргізуші «Alpha» скутерін байқамай қалып, соқтығысқан. Жол-көлік оқиғасы салдарынан 15 жастағы петропавлдық жарақаттанды. Аталған фактілер бойынша әкімшілік құқық бұзушылық туралы материалдар жиналып, процессуалдық шешім қабылдау үшін Петропавл қалалық Әкімшілік полиция бөліміне жіберілді.
-Қос дөңгелекті көліктердің жүргізушілері мен жолаушылары әрқашан да бекітілген мотоцикл дулығасын киюі тиіс, жарық шамдары қосулы болуы қажет. 16 жасқа толмағандарға және жол қозғалысы ережелерін білмейтіндерге скутерлерді жүргізуге тыйым салынған, — дейді СҚО ПД жергілікті полиция қызметі басқармасының бастығы Айдын Байматов.
Жыл басынан СҚО-да мотоциклдер мен скутерлердің қатысуымен 4 жол-көлік оқиғасы орын алды.
Фото: СҚО ПД баспасөз қызметінен
