«Қазақстан халқына» қорының төрағасы ұйымның азаматтарға көрсеткен көмегі бойынша есеп пен қайырымдылық қызметті ұйымдастыру жолдары жөнінде ақпарат берді, деп хабарлайды Qyzyljarnews.kz тілшісі.
Болат Жәмішевтің айтуынша, қазір қор 10 қайырымдылық бағдарлама мен жобаны жүзеге асыруда. Сегізі медициналық көмек көрсетуге, біреуі ауыл балалары үшін спорт саласындағы әлеуметтік жағдайды жақсартуға бағытталса, тағы бірі ауылдық жерлерден шыққан талапкерлер мен аз қамтылған отбасылардың студент балаларына білім гранттарын беруді қарастырады.
Мемлекет басшысы қордың мақсатты бағыттарын анықтауға қоғам мен қоғамдық институттарды белсенді түрде тарту қажет екеніне баса мән берді. Қор төрағасы тағы жаңадан толықтырылған тұжырымдаманы және қайырымдылық бағытындағы бағдарламалар мен жобалар әзірлеуді қолға алғандарын айтты.
Фото: Президенттің баспасөз қызметінен
