Цифрлық даму, инновациялар және аэроғарыш өнеркәсібі министрлігі халыққа қызмет көрсету орталықтарының жұмыс кестесіне өзгерістер енгізілетін бұйрық дайындады, деп хабарлайды Qyzyljarnews.kz тілшісі.
Атап айтқанда, өтініштерді қабылдау және мемлекеттік қызметтердің дайын нәтижелерін беру мемлекеттік корпорация арқылы дүйсенбіден жұманы қоса алғанда сағат 9:00-ден 18:00-ге дейін үзіліссіз жүзеге асырылатын болады.
Бұл ретте мемлекеттік корпорацияның халыққа қызмет көрсету кезекші бөлімдері мереке және демалыс күндерін қоспағанда, дүйсенбі-жұма аралығында сағат 9:00-ден 20:00-ге дейін және сенбі күні сағат 9:00-ден 13:00-ге дейін жұмыс істейтін болады.
Қазіргі уақытта ХҚКО-лар жексенбі және мереке күндерін қоспағанда, 9:00-ден 20:00-ге дейін үзіліссіз жұмыс істейді.
Министрлік жұмыс кестесінің өзгеруі қызметкерлер санының қысқаруына байланысты деп түсіндірді.
Фото: ашық дереккөздерден.
