Петропавлдық полицейлер 6 күн ішінде жол-көлік ережелерінің 300-ге жуық бұзушылығын анықтады, деп хабарлайды Qyzyljarnews.kz тілшісі.
Биыл СҚО-да 127 жол-көлік оқиғасы тіркелді. Оның 40-ында көліктер бетпе-бет соқтығысқан. Жолдағы қақтығыстардың алдын алып, тұрғындардың қауіпсіздігін қамтамасыз ету мақсатында облыста шілденің 19-нан бастап «Қауіпсіз жол» акциясы өткізілуде.
Әсіресе, жаяу жүргіншілердің қауіпсіздігі басты назарда. Айта кететіні, жыл басынан облыста жаяу жүргіншілердің қатысуымен 33 апат тіркелді. Салдарынан 5 адам қаза тауып, 35-і жарақат алған.
-Акция басталғалы тек облыс орталығының аумағында ғана жолда 278 түрлі құқық бұзушылықтар анықталды. Жаяу жүргіншілер мен велосипедшілер тарапынан орын алған жол жүрісі ережелерінің 41 бұзушылығы, көлікті масаң күйде басқарудың 6 фактісі тіркеліп отыр. Рөлде отырып телефон қолданғаны үшін 14 жүргізуші жауапкершілікке тартылды, — дейді СҚО ПД жергілікті полиция қызметі басқармасы бастығының міндетін атқарушы Александр Розбах.
Фото: СҚО ПД баспасөз қызметінен
