Жаңа оқу жылында Kozybayev University Аризона Университетімен бірлесіп халықаралық білім беру жобаларын жүзеге асырмақ. Нәтижесінде Қазақстандық студенттерге 500 грант бөлінеді. Мұнымен қоса, соңғы семестрде студенттер Америкадағы филиалда білім алады, деп хабарлайды Qyzyljarnews.kz тілшісі.
Америкалық және қазақстандық үлгідегі дипломдар биотехнология, өсімдіктер туралы ғылым, өсімдіктер саулығы туралы ғылым және технологиялар, ақпараттық жүйелер және тамақ қауіпсіздігі мамандықтары бойынша беріледі. Айта кетейік, келесі жылы бағдарламалар саны артуы мүмкін.
— Құжаттарды қабылдау комиссиясына, сондай-ақ виртуалды қабылдау комиссиясы арқылы тапсырады. Талапкерлер бізге құжаттардың түпнұсқаларын ғана әкеледі, яғни аттестат, ҰБТ сертификаты, жеке куәлік, болған жағдайда-медициналық анықтама. Бұл жерде грант университеттің өзінде қалады деп айтқым келеді. Бұл университетке квота арқылы бөлінген гранттар. Сондықтан осы халықаралық бағдарлама бізге ұсынып отырған 500 грант университеттің өзінде қалады, дейді Kozybayev University қабылдау бойынша департаментінің директоры Гүлмира Оспанова.
Қайрат Сапаров Аризона университетінде осыдан бес жыл бұрын оқып, магистр дәрежесін алған. Яғни шетелдік ЖОО-ның білім беру жүйесімен жақсы таныс. Назарбаев Университетінде және түрлі басшылық лауазымдарда еңбектенген білікті маман бүгінгі күні М.Қозыбаев университетіндегі шет тілдерді оқыту орталығының жетекшісі, әрі оқытушылар мен студенттерге ағылшын тілінен сабақ береді.
Фото: Ашық дереккөздерден.
