СҚО-да биыл ауыл шаруашылығы өнімдерін шығару көлемін триллион теңгеге дейін арттыруды жоспарланып отыр. Бұл туралы республикалық мал өсірушілер слетінде облыс әкімі Құмар Ақсақалов мәлімдеді, деп хабарлайды Qyzyljarnews.kz тілшісі.
Өңір басшысының мәліметінше, облыста инвестиция көлемі 76 млрд. теңгеден асатын 31 жоба жүзеге асырылуда. Оның ішінде 17 сүт-тауар фермасы, үш құс фабрикасы, бір шошқа кешені, алты элеватор және басқалары бар.
— Біздің облыста әлеуметтік кәсіпкерлік корпорациясы арқылы жобаларды қаржыландырудың пилоттық бағдарламасы жұмыс істейді. Ол бойынша 4% жеңілдікпен несие беріледі, оны төлей алмаған жағдайда қарыздарды қайтару үшін 2 жыл уақыт беріледі. Бұл адал кепілдік саясат деп білемін. Аталған тәжірибені республикамыздың басқа да облыстарында қолдануға болады. Мемлекет басшысы елді негізгі азық-түлікпен толық қамтамасыз ету міндетін қойды. Агроөнеркәсіптік кешендегі барлық жобаларды іске асырудың нәтижесінде азық — түлік қауіпсіздігі қамтамасыз етіліп, жыл сайын ауыл шаруашылығы өнімдерінің экспорты артады, — деп атап өтті Құмар Ақсақалов.
Ауыл шаруашылығы министрі Ербол Қарашөкеевтың айтуынша, өткен жылы елімізде 35 сүт-тауар фермасы енгізілсе, оның 10 – ы СҚО-ға тиесілі. Өңір республикада мал шаруашылығын дамыту бойынша алдыңғы қатарда.
Stock иллюстрациялық суреті
