СҚО полицейлері 4 күнде 12 қару тәркіледі, деп хабарлайды Qyzyljarnews.kz тілшісі.
Тамыздың 25-нен 28-і аралығында облыс аумағында «Қару» жедел-профилактикалық іс-шарасы өтті. Оның барысында 45 патрон және заңсыз сақталып келген 12 қару, оның ішінде 7 тегіс ұңғылы, 2 травматикалық, 1 ойықты және газды қару, 1 револьвер тәркіленді. Алынған қару сараптамаға жіберілді, заңсыз иелері жауапқа тартылды.
-Қару заңмен белгіленген қатаң тәртіпке сай сақталуы тиіс. Тіркелмеген қару қауіпті: ол жазатайым оқиғаға себепші болуы мүмкін, қолды болып, қылмыста қолданылуы мүмкін. Қаруды және оқ-дәрілерді заңсыз сақтағаны үшін әкімшілік және қылмыстық жауапкершілік көзделген. Жауапкершіліктен қаруды полицияға өз еркімен тапсырғандар ғана босатылады. – дейді СҚО ПД криминалдық полиция басқармасы бастығының міндетін атқарушы Мадияр Харипов.
Айта кететіні, жедел-профилактикалық іс-шара барысында 4 тегіс ұңғылы мылтық тапсырылды. Мәселен, Жамбыл ауданының тұрғыны қайтыс болған әкесіне тиесілі болған ТОЗ-БМ мылтығын әкеліп тапсырған. Полицейлер облыс тұрғындарын қауіптен сақтанып, қаруды тапсыруға шақырады. Қаруды заңсыз сақтау фактілерін анықтау жұмысы тұрақты негізде жалғасатын болады.
