Оқу жылы басталар алдында әкімшілік полицейлер 100-ге тарта жол-көше желісін тексерді, деп хабарлайды Qyzyljarnews.kz тілшісі.
Петропавлда «Абайлаңыз – балалар!» іс-шарасының бірінші кезеңі шеңберінде әкімшілік полиция қызметкерлері жергілікті атқарушы органдармен бірлесіп, Мағжан Жұмабаев атындағы IT-мектеп-лицейі жанындағы Пушкин көшесінің бойында жаяу жүргіншілер үшін батырмасы бар бағдаршам орнатты.
Оқу жылы басталар алдында әкімшілік полицейлер жол-көше желілерін тексеруді күшейтті. Облыс орталығында 162 жаяу жүргінші өткелі бар. Қазіргі уақытта 96 тексеріс жүргізіліп, оның қорытындысы бойынша табылған кемшіліктерді жоюға 24 анықтама берілді, оқу орындарына жақын жол мен құрылғыларды күтіп-ұстауға жауапты тұлғаларға қатысты 7 әкімшілік материал жиналды.
22 тамыздан бастап облыс жолдарында мыңнан аса жолда жүру ережелерін бұзу фактісі анықталғанын айта кеткен жөн. Білім күні қарсаңында полицейлер барынша оқу орындарына жақын жерлерде кезекшілік атқарып, Жол қозғалысы қағидалары мен көшедегі қауіпсіздік шараларын түсіндіру үшін балалар және олардың ата-аналарына жолдағы қауіпсіздік туралы ақпарат берді.
