2022 жылғы 6-9 қыркүйек аралығында 6654 әскери бөлімінің Қаракемер кенті базасында әскери бессайыстан Ұлттық ұланның жеке-командалық чемпионаты өтті, деп хабарлайды Qyzyljarnews.kz тілшісі.
Аталған чемпионатқа «Орталық», «Шығыс», «Батыс», «Оңтүстік» өңірлік қолбасшылығының, сондай-ақ Ұлттық ұлан Академиясының және 5573 әскери бөлімінің әскери қызметшілері қатысты. Жарыстың қорытындысы бойынша Ұлттық ұлан гвардиясы академиясының әскери қызметшілері жүлделі орындарға ие болды.
«АК-1» – автоматынан ату жаттығуында оқу процесін қамтамасыз ету батальоны РХБЗ бөлімшесінің бастығы, машина командирі аға сержант Арман Кәрібай 1 орын алса, кедергілердің бірыңғай белдеуінен өту жаттығуында 2 және 3 орынды 4 курс курсанттары Нүркен Тоқпай мен Арыстан Мұхамбетжан иеленді. «Ф-1» гранатасын лақтыру жаттығуында 3 орынды 4 курс курсанты Арыстан Мұхамбетжан жеңіп алса, жеке жалпы есепте 2 орынды 4 курс курсанты Нұркен Тоқпай иеленді. Сондай — ақ чемпионатқа қатысушылар 1000 метрге жүгіруден жарысты, оның нәтижесі бойынша Ұлттық гвардия академиясының дене шынықтыру және спорт қызметінің бастығы-ҚПҚ кафедрасының аға оқытушысы капитан Әсет Байсбаев 1 орынға ие болды.
Жалпы командалық есеп қорытындысы бойынша Ұлттық гвардия академиясының командасы 2 орынға тұрақтады. Жарыстың жеңімпаздары мен жүлдегерлері кубоктармен, медальдармен және бағалы сыйлықтармен марапатталды.
