2022 жылғы 17 қыркүйекте Ұлттық ұланның 6637 әскери бөлімінің әскери атыс алаңында «СФЕРО» бизнес-клубының бастамасымен және ұйымдастырылуымен «Атмосфера» әскери-спорттық жарысы өтті, деп хабарлайды Qyzyljarnews.kz тілшісі.
Аталған іс-шараның мақсаты салауатты өмір салтын насихаттау, командалық рухты қалыптастыру, өскелең ұрпақты патриотизм рухында тәрбиелеу, сондай-ақ халық арасында дене шынықтыру мен спортты танымал ету.
Әскери-спорттық жарысқа барлығы 120-ға жуық адам қатысты. Оның ішінде коммерциялық ұйымдардың ұжымдары, спортшылар, әуесқойлар, белсенділер және Ұлттық ұлан академиясының әскери қызметшілері бар.
Іс-шара аясында қонақтардың назарына әскери техника мен оқу атыс қаруы ұсынылды. Сондай-ақ мұнда қаланың музыкалық ұжымдары мен Ұлттық ұлан академиясының әскери оркестрінің қатысуымен шағын концерт өтті.
Спорттық іс-шара аяқталғаннан кейін төрешілер алқасы жарысты қорытындылады. Командалық есеп бойынша Ұлттық ұлан академиясының құрамасы 1 орынға ие болды. Жарыс жеңімпаздары мен жүлдегерлеріне медальдар, грамоталар мен сыйлықтар табыс етілді.
Фото: Ұлттық ұлан академиясының баспасөз қызметі
