Петропавлда “Үздік ілеспе аудармашы” байқауының облыстық кезеңі өтті, деп хабарлайды Qyzyljarnews.kz тілшісі.
Өңірімізде мұндай сайыс алғаш рет ұйымдастырылуда. Жуырда бұл байқаудың ауданаралық кезеңі өткен болатын. Сол кезде әр ауданнан бір жеңімпаздан анықталды. Аталған байқауларда үздік шыққан 11 қатысушы облыстық деңгейде бақ сынады.
– Бүгінгі таңда қазақ тілі бірінші орынға қойылып отыр. Оны келіп түскен кіріс қағаздарынан да байқауға болады. Қазақ тіліне қойылған талап өте жоғары. Жалпы, “Үздік ілеспе аудармашы” байқауы 3 кезеңнен тұрады. Біріншісі “Терминдер әлемі” деп аталады. Бұл кезеңде қатысушылардың мемлекеттік терминологиялық комиссия бекіткен терминдерді білу деңгейі тексерілді. 2-ші кезең – “Ілеспе аударма шебері”. Онда мамандар мәтінді қазақ тілінен орыс тіліне аударулары қажет. Ал 3-ші кезең – “Үздік аударма” деп аталады. Онда керісінше мәтінді орыс тілінен қазақ тіліне аудару қажет,- дейді СҚО мәдениет, тілдерді дамыту және архив ісі басқармасының бас маманы Нәзира Бимақова.
Байқау аяқталысымен конкурс жеңімпаздары мен жүлдегерлеріне арнайы дипломдар мен алғыс хаттар табысталды.
