СҚО-дағы «Жамбыл» орман шаруашылығының директоры 15 мың теңге көлемінде пара алғаны үшін сотталды. Оған 25 есе мөлшерде айыппұл немесе 375 мың теңге көлемінде жаза тағайындалды, деп хабарлайды Qyzyljarnews.kz тілшісі.
Сыбайлас жемқорлыққа қарсы іс-қимыл департаментінің баспасөз қызметінің мәліметінше, ведомствода заңсыз сыйақы алуға ықпал еткен мән-жайлар қаралды.
«Жамбыл» орман шаруашылығының директоры Исимбаев осы жылдың мамыр айында Қостанай облысының тұрғыны Трифоновтан 100 текше метр қайың мен көктеректі кесуге рұқсат бергені үшін 15 мың теңге алған. Енді Исимбаев бюджетке әлдеқайда көп соманы төлеуі керек. Үкім заңды күшіне енді. Сыбайлас жемқорлыққа қарсы қызмет тікелей басшы Исимбаевты қатаң тәртіптік жауапкершілікке тартуды, уәкілетті органға демалыс рәсімі көлемінің нормасын регламенттейтін жаңа мемлекеттік қызметті енгізуді ұсынды.
