Петропавлда су құбыры зақымданып, қаланы желіден ажыратуға тура келді, деп хабарлайды Qyzyljarnews.kz тілшісі.
Петропавлдағы Интернационал көшесін әп-сәтте су басты. Әлеуметтік желіде тараған бейнежазбалардан судың қатты ағысын көруге болады. Тұрғындар қаланың әр ауданында судың тоқтатылғанын айтып жатыр.
«Қызылжар су» ЖШС баспасөз қызметінің мәліметінше, Жұмабаев-Абай көшелері қиылысындағы учаскеде диаметрі 800 мм су құбыры зақымданған. Қазіргі уақытта осы апат болған учаскеде суды тоқтату жұмыстары жүргізіліп жатыр.
– Қалаға баратын судың қысымын уақытша төмендетуге тура келді. Бір сағаттан кейін ол қалпына келтіріледі. Бірақ, су құбыры зақымданған учаскедегі 10 көп қабатты үйге су тек бір тәуліктен кейін ғана, апаттың салдары жойылғаннан соң берілмек, — деді кәсіпорынның баспасөз хатшысы Индира Қалиева.
