Петропавлдағы спорт сарайында көпсайыстан Қазақстан Республикасы президентінің кубогы өтті. Жүлделер үшін шайқасқа 8 командадан 100-ге жуық адам қатысты, деп хабарлайды Qyzyljarnews.kz тілшісі.
4 күн бойы 11 мен 70 жас аралығындағы спортшылар өз күштерін бірнеше спорт түрінен яғни, қысқа қашықтыққа жүгіру, жүзу, пневматикалық мылтықпен ату, снаряд лақтыру және шыдамдылыққа жүгіру бойынша өз бақтарын сынады.
– Шараның басты мақсаты – жас өскелең ұрпаққа тәлім-тәрбие көрсету. Сонымен қатар, президенттік сынақты ары қарай дамытып, соны жоғары деңгейге көтеру. Бұл жарысты жастарымыз осы спортпен айналыссын деген ниетте өткізіп отырмыз,- дейді жарыстың төрешісі Нұрлан Құрманғазин.
Жарыс қорытындысы бойынша жүлдегерлер мен жеңімпаздар дипломдар, грамоталар және медальдармен марапатталды. Жеңіс тұғырының ең биік сатысынан көрінген командаға кубок табыс етілді.