Күздегі әскерге шақыру науқаны жалғасуда. Бүгіндері облыстан борышын өтеуге 364 жас азамат аттанды, деп хабарлайды Qyzyljarnews.kz тілшісі.
Облыстық қорғаныс істер жөніндегі департаменті баспасөз қызметінің мәліметінше, әскер қатарына шақырту алғандар алдымен психологиялық және медициналық сараптамадан өтті. Дені сау деп танылғандар Отан алдындағы борышын өтеуге еліміздің әскери бөлімдеріне жөнелтілді.
– Қазіргі уақытта Ұлттық қауіпсіздік комитетінің шекара қызметі сапына 100, мемлекеттік күзет қызметіне 4, еліміздің қарулы күштері жасақтарына 240 және Төтенше жағдайлар министрлігінің бөлімшелеріне 20 адам жіберілді, – дейді қорғаныс істері жөніндегі департаменттің әскери-патриоттық және қарулы күштер ардагерлерімен жұмыс қызметінің жетекшісі Айман Әбжаппарова.
Күзгі әскери шақыру науқаны желтоқсанның 28-не дейін жалғасып, жоспар бойынша өңірден Ұлттық гвардияға 222 болашақ сарбаз аттанбақшы.
