Петропавл қаласының спорт мектеп-интернатында Ұлттық ұлан академиясының курсанттары арасында халықаралық дәрежедегі спорт шебері, әлем біріншілігінің күміс жүлдегері, Азия чемпионы Азамат Нұрпейісовті еске алуға арналған қоян-қолтық ұрыстан сайыс өтті, деп хабарлайды Qyzyljarnews.kz тілшісі.
Азаматтың әкесі Ерік Нұрпейісов өмірден ерте кеткен ұлын еске алып, осындай сайыс ұйымдастырып отырған академия басшылығына алғысын жеткізді. Олимпиадалық жүйе бойынша өткен турнирге 70-тен астам курсант қатысып, 7 салмақ дәрежесінде сынға түсті.
Жарыс нәтижесі бойынша 57 килограммға дейінгі салмақ дәрежесінде Ақжол Ақылша, 62 килограмда Аманбек Рахметов, 67 килограмда Еламан Асқарұлы, 73 килограмда Жомарт Тұрсын, 80 килограмда Ғаламат Марат, 88 килограмда Жарқын Мұратқажы, (+88) килограмда Нияз Зубайров чемпион атанды. Жалпы командалық есепте бірінші орынды 3 оқу батальонының 5 оқу ротасының құрама командасы иеленді.
