Көкшетау қаласында Петропавл-Көкшетау теміржол учаскесінің пайдалануға берілгеніне 100 жыл толуына орай салтанатты іс-шара өтті. Оған облыстық және қалалық әкімдік өкілдері, сала қызметкерлері мен ардагерлері қатысты, деп хабарлайды Qyzyljarnews.kz тілшісі.
Мереке құрметіне саланың дамуына қосқан үлесі, адал еңбегі және еңбектегі жетістіктері үшін Ақмола өңірінің 220 қызметкері мен зейнеткері «Петропавл — Көкшетау темір жол учаскесіне 100 жыл» мерекелік медалімен және төсбелгісімен, 200 маман — жол бөлімшесі басшылығының грамоталарымен марапатталды.
Дәл бір ғасыр бұрын Петропавл — Көкшетау учаскесінде тұрақты паровоз қозғалысы ашылды. Жол маңызды азық-түлік магистралі ретінде салынды. Ол арқылы бай Солтүстік Қазақстаннан елдің аштыққа ұшыраған орталық аудандарына бидай әкелінді. Осының арқасында миллиондаған адам аштықтан аман қалды. Құрылыс жұмыстарына тартылғандардың бір бөлігі Оралдан, Архангельск, Бескөл, Боголюбов, Вознесен болыстарынан келді. Құрылысшылардың негізгі дені жергілікті тұрғындардан жұмылдырылды. Барлық жұмыстар жануарлардың тарту күшімен қолмен жүргізілді. Әр құрылыс алаңында шамамен 2,5 мың жылқы, бұқа мен 800 арба болды.
Жаңа желіні енгізу өңірлер арасындағы ішкі байланыстарды қамтамасыз етіп, ел экономикасының дамуына серпін бергенін айта кеткен жөн. Теміржол желілерінің бойында жаңа станциялар, қажетті әлеуметтік инфрақұрылым, қалалар салынып, өнеркәсіп салалары дамыды. Нан магистралін салудағы жетістіктері үшін Петрококчестрой басқармасы ұжымы Еңбек Қызыл Ту орденімен марапатталды.
Бүгінде Ақмола теміржолшылары Солтүстік Қазақстанның үш ірі өңіріне көліктік қызмет көрсетуді жүзеге асыруда. Ақмола бөлімшесі Петропавл және Пресногорьковская станцияларымен Ресей Федерациясының Оңтүстік Орал теміржолымен, Новоишимская, Ерейментау, Сороковая, Есіл станцияларымен, Қарағанды, Павлодар және Қостанай жол бөлімшелерімен шектеседі. Темір жолдарының жайылғандағы ұзындығы 2732,3 км, жалпы ұзындығы 1569,9 км, оның ішінде бір жолды желілер – 415,2 км, екі жолды 1154,7 км, олар толығымен электрлендірілген.
