Петропавлға сауда-экономикалық миссиясымен Омбы қаласының 9 кәсіпорнынан делегация келді. Екі елдің бизнес өкілдерінің кездесуі Солтүстік Қазақстан облысының кәсіпкерлер палатасының алаңында өтті, деп хабарлайды Qyzyljarnews.kz тілшісі.
Кәсіпкерлердің біздің өңірге келуінің басты мақсаты — жаңа іскер серіктестерді іздеп, СҚО кәсіпорындарымен және ұйымдарымен сауда-экономикалық және кооперациялық байланыстарды кеңейту болды.
— 2009 жылдан бастап қалыптасқан ынтымақтастықтың арқасында қарым-қатынасымыз барлық салада дамып келеді. Осы уақыт ішінде біз өнеркәсіптік өндірістің тұрақты өсімін көрсетіп келеміз, — деп атап өтті Омбы әкімшілігі қалалық экономикалық саясат департаменті тұтыну нарығын дамыту және сыртқы экономикалық қызмет басқармасы бастығының орынбасары Инесса Колесен.
Оның айтуынша, екі елдің экспорт/импорт құрылымы ұқсас. Мәселен, Омбы облысы Қазақстанға машина жасау саласы өнімдерін, азық-түлік тауарларын, шикізатты, химия өнеркәсібі өнімдерін, каучук, металдар мен олардан жасалған бұйымдарды жеткізеді. Ал Қазақстан Ресей аймағына машина жасау өнімдерін, азық-түлікті, ауыл шаруашылығы шикізатын және минералды отынды (көмірді) экспорттайды. Жалпы В2В форматында өткен Омбы компанияларымен байланыс биржасына барлығы 40-тан астам Солтүстік Қазақстан кәсіпорындарының өкілдері қатысты. Омбының сауда-экономикалық миссиясы Петропавлда екі күнге жалғасады, оның шеңберінде жергілікті кәсіпорындар мен «Qyzyljar»арнайы экономикалық аймағына барады.
