Денсаулық сақтау министрі Ажар Ғиният Солтүстік Қазақстан облысының медициналық ұйымдары басшыларымен халыққа медициналық көмек көрсетудің проблемалық мәселелері бойынша кеңес өткізді, деп хабарлайды Qyzyljarnews.kz тілшісі ведомствоның баспасөз қызметіне сілтеме жасап.
Кеңес жұмысына СҚО Денсаулық сақтау басқармасының, ӘлМСҚ аумақтық ведомстволық бағынысты ұйымдарының, МФБКД басшылары қатысты.
– 2022 жылдың 11 айының қорытындысы бойынша Солтүстік Қазақстан облысында халықтың жалпы өлімі көрсеткішінің 24,8%-ға төмендеуі байқалады, алайда ол орташа республикалық мәннен 70,2%-ға артық, — деп атап өтті Денсаулық сақтау вице-министрі Вячеслав Дудник.
Оның айтуынша, өңірде қанайналым жүйесі ауруларынан болатын өлім-жітім көрсеткіші өткен жылдың сәйкес кезеңімен салыстырғанда 14,4%-ға төмендеді, бұл – республикалық орташа көрсеткіштен 20%-ға артық. Сонымен қатар, облыста жарақаттардан, уланудан және жазатайым оқиғалардан болатын өлім-жітім 2021 жылдың сәйкес кезеңімен салыстырғанда 13,3%-ға төмендегені байқалады.
Вице-министр аурухана ғимараттарының тозуы, арнайы бейін мамандарының, әсіресе кардиология мен акушерияда тапшылығы, диагностикалық жабдықтардың жеткіліксіз паркіне қатысты негізгі проблемалық мәселелерге назар аударды. Мысалы, В. Дудниктің айтуынша, 13 аудандық аурухананың тек 4-уінде ғана кардиолог дәрігерлер бар, қалғандарында алмастыратын дәрігерлер немесе ЖПД дәрігерлері жұмыс істейді.
Фото: Денсаулық сақтау министрлігінің баспасөз қызметі
