Петропавлда полиция қызметкеріне қол жұмсаған елорда тұрғыны ірі айыппұл төлеуі немесе бас бостандығынан айырылуы мүмкін, деп хабарлайды Qyzyljarnews.kz тілшісі.
Ақпан айының басында түнгі сағат 02:20 шамасында Әуезов көшесіндегі “391 модуль” стационарлық бекетінде қызмет атқарып жүрген Петропавл қаласы ПБ патрульдік полиция батальонының қызметкерлері қимылсыз отырған адамға назар аударған. Тәртіп сақшылары оған көмек ұсыну ниетімен қасына барып жөн сұраспақ болған кезде ішімдікте сылқия тойған Астана қаласының 44 жастағы тұрғыны қоғамдық орында мас күйде болғаны үшін әкімшілік материал жинап жатқан полиция қызметкерлерінің біріне соққы жасаған.
– Аталған дерек Қазақстан Республикасы ҚК-нің 380-бабының 3-бөлігі (Билік өкіліне қатысты қорқыту немесе күш көрсету әрекеттері) бойынша сотқа дейінгі тергеп-тексерулердің бірыңғай тізілімінде тіркелді. Күдіктіге қатысты үйқамақ түріндегі бұлтартпау шарасы таңдалды. Естеріңізге сала кетейік, билік өкілінің қызметтік міндеттерін атқаруына байланысты оған қатысты күш қолдану үшін заңмен 4 мың айлық есептік көрсеткішке дейінгі мөлшерде айыппұл салудан 3 жылға дейінгі мерзімге бас бостандығынан айыруға дейінгі жауапкершілік көзделген, – дейді Петропавл қаласы ПБ тергеу бөлімінің бастығы Нұржан Омаров.
