Петропавлда мүмкіндігі шектеулі және денсаулығында ауытқуы бар балаларға арналған «Жас жауынгер» сауықтыру клубы ашылды. Еріктілердің күшімен іске қосылған жоба аясында ерекше балғындар спорттық үйірмелерге қатысу мүмкіндігіне ие болды, деп хабарлайды Qyzyljarnews.kz тілшісі Qyzyljartv.kz телеарнасына сілтеме жасап.
«Жас жауынгер» дене шынықтыру және сауықтыру клубының спорт залында даун синдромы мен ДЦП-ға шалдыққан 15 бала жаттығады. Бұл орталықтың ашылуымен ата-аналар ерекше балаларын арнайы үйірмелерге жаздыртуға мүмкіндік алды. Жаттықтырушы Наталья Третьякованың айтуынша, Петропавлда мүмкіндігі шектеулі жандар көп, бірақ оларға арналған сауықтыру кешендері мен спорт үйірмелері мүлдем жоқтың қасы.
– Жаттығуларымызда армрестлинг, ММА спортының тәсілдерін қолданамыз, балаларды бейімдейміз. Олардың қандай спорт түріне ыңғайы келетінін көреміз. Бұл балаларды өздерін танытуға және әртүрлі спорт түрлерімен айналысуына үлкен мүмкіндік, – дейді жаттықтырушы Наталья Третьякова.
