«Жол активтерінің ұлттық сапа орталығының» филиалында облыстық жолаушылар көлігі және автомобиль жолдары басқармасы мен аудандық тұрғын үй-коммуналдық шаруашылығы бөлімдерінің қызметкерлеріне семинар ұйымдастырылды, деп хабарлайды Qyzyljarnews.kz тілшісі mtrk.kz сайтына сілтеме жасап.
Семинардың мақсаты – жергілікті атқарушы орган қызметкерлерінің автожол саласына қатысты біліктіліктерін арттыру. Шара барысында елордадан келген мамандар жол сапасын тексерудің қыр-сырын түсіндіріп, тәжірибелерімен бөлісті.
– Жол жұмысының сапасы мен материалдарына сараптама жүргізу жергілікті атқарушы органдармен жасалған келісімшарт негізінде жүргізіледі. Кейін біздің филиалмен жоспар құрайды да жолға шығып оған сараптама жасайды. Жолдың құрылысының әрбір сатысында материалдың, жұмыстың сапасын тексереді және сол бойынша қорытынды жасайды. Сол қорытынды кейіннен тапсырыс берушілерге беріліп, олар ары қарай өздері тиісті шара қабылдайды, – дейді «Жол активтерінің ұлттық сапа орталығы» РМК бөлім басшысы Елдар Әбенов.
Елімізде жол сапасын тексеретін акредиттелген 17 зертхана бар. Соның біреуі Петропавлда орналасқан. Жалпы, «Жол активтерінің ұлттық сапа орталығының» мамандары былтыр республика бойынша 10 мыңнан астам инспекциялық тексеріс жүргізді. 32 мыңнан астам сынама алынып, 10 мыңға жуығында нормадан ауытқушылық анықталған.
