Өткен жылы өңірдегі ауыл шаруашылығы кешенін дамытуға қомақты қаражат құйылып, майлы дақылдар егілетін алқап аумағы 960 мың гектарға дейін кеңейтілді. Нәтижесінде бұл көрсеткіш 2016 жылмен салыстырғанда 1,9 есеге артты. Сондай-ақ 8 тауарлы-сүт фермасы қолданысқа беріліп, оған 13,3 млрд. теңге жұмсалды, деп хабарлайды Qyzyljarnews.kz тілшісі.
СҚО экономика басқармасының жетекшісі Қуанышбек Қалижановтың айтуынша, «2021-2025 жылдарға облыстың кешенді әлеуметтік-экомикалық даму» бағдарламасы аясында бұл жұмыс биыл да жалғасын табады.
– Биыл облыс аудандарында 8,5 мың ірі қараға шақталған 9 тауарлы-сүт фермасы тұрғызылады. Бұл мақсатқа 20,9 млрд. теңге бағытталады. Құс етінің импортын алмастыру бағытында өңірде 2 фабрика бар екенін атап өткен жөн. Бүгіндері «Eurasiаn Milk» жауапкершілігі шектеулі серіктестігінің зауыты жұмысы қайта жаңғыртылып, кәсіпорын жылына 55 мың тоннаға дейін сүт өнімін өңдей алатын болды. Аймақтағы шошқа өсіретін кешен кеңейтіліп, оның сыйымдылығы 200 басқа жетті. Агроқұрылымдар 81,1 млрд. теңге сомаға 2,4 мың техника сатып алды. Биыл тағы соншама техника алу көзделген, – деді Қуанышбек Қалижанов.
