Өткен жылы облыста инвестициялық жобаларды жүзеге асыруға 29 млрд. теңге бөлінді. Нәтижесінде өңірде тың өндіріс ошақтары іске қосылып, жаңа жұмыс орындар ашылды, деп хабарлайды Qyzyljarnews.kz тілшісі.
Былтыр облыстың әлеуметтік-экономикалық дамуының кешенді жоспары аясында өнеркәсіп саласында бірқатар инвестициялық жобалар іске асырылды. Петропавлда вагон-термостарды шығару бастамасы қолға алынып, 131 данасы құрастырылды. Құйылған қаражат көлемі 7,8 млрд. теңгені құрады. Сондай-ақ қағаз өнімдерін әзірлеу фабрикасы ашылып, жеке кәсіпкер 2,5 млрд. теңге инвестиция құйды. Өндіріс ошағының жылдық қуаты 5 мың тонна болмақ. Бүгіндері бұл кәсіпорында 80 адам еңбек етуде.
Облыстың құрылыс саласында автолкавты газоблоктар өндірісі қолға алынды. Құйылған инвестиция 1,5 млрд. теңгені құрады. Кәсіпорынның ашылуымен 60 жаңа жұмыс орны пайда болды.
Биыл өңірде «Сапа Инвест Плюс» жауапкершілігі шектеулі серіктестігі бөлшектік ағаш тақтайларын шығару ісін қолға алмақ. Екі корпустан тұратын өндіріс ошағының құрылысы үстіміздегі жылдың 4-ші тоқсанында аяқталады. Сондай-ақ Петропавлда «Масло-Дел» ЖШС май-экстракциялық зауытты салуда. Облыс орталығында «KIA» және «Aster» автосалондары ашылады.
Жалпы облыстың әлеуметтік-экономикалық дамуының кешенді жоспарын 2025 жылға дейін іске асыруға 381 млрд. теңге инвестиция бағытталмақшы. Оның 29 млрд. теңгесі өткен жылы игерілгенін атап өткен жөн.
