Облыстың құрылыс компанияларының өкілдері Петропавлдағы жылу-элетр орталығының жағдайына алаңдаулы. Олар жаңа жылыту маусымында салынған көпқабатты тұрғын үйлерге жылу жетпеуі мүмкін деп дабыл қағуда, деп хабарлайды Qyzyljarnews.kz тілшісі.
Бұл мәселені құрылысшылар облыстық кәсіпкерлер палатасында өңір басшысының орынбасары Сәтжан Аблалиевтың қатысуымен өткен кездесуде көтерді. Шенеунік әзірге алаңдаушылық негізсіз екенін алға тартып отыр.
– Станцияның қуаты-713 Гкал. Таратылған техникалық шарттарға инспекция жүргізілді. Тексерістен кейін берілген техникалық шарттарды азайту туралы шешім қабылданды. Жылу қуаты әлеуметтік нысандармен қатар, алдағы 2-3 жылдың ішінде салынатын тұрғын үйлерді жылумен қамтуға жеткілікті. Биыл жаңа нысандарға техникалық шарттарды тарата бастаймыз, — деді Сәтжан Аблалиев.
Облыс әкімінің орынбасары биыл Петропавл ЖЭО-2-де жөндеу жұмыстары жалғасып, жаңа түтін құбырының құрылысы басталатынын айтты.
– Өткен жылы жылыту маусымына дайындық кезінде акционерлер қазандықтарды, ғимараттарды, газ құбырларын жөндеуге 12,5 млрд. теңге бөлді. Жақында облыс әкімі акционерлермен кездесті. Олар алдағы жылыту маусымының жоспарлары туралы хабарлады. ЖЭО-ны әртүрлі жөндеуге шамамен 9 млрд. теңге салынады, жаңа түтін құбырының құрылысы басталады. Құрылыс жыл соңында аяқталады, — деді СҚО әкімінің орынбасары.
