Ауыз сумен қамтуға жұмсалатын қаражат әуелі көрсеткіштері төмен өңірлерге бағытталады. Үкімет отырысында Индустрия және инфрақұрылымдық даму министрі Марат Қарабаев осындай мәлімет айтты, деп хабарлайды Qyzyljarnews.kz.
— 2022 жылдың қорытындысы бойынша ауыз суға қолжетімділік қалаларда 98,4% және ауылдарда 94,5% болды. 9 өңірдің (Ақтөбе, Алматы, Атырау, Жетісу, Маңғыстау, Солтүстік Қазақстан, Батыс Қазақстан, Қызылорда және Ұлытау) қала тұрғындары ауыз сумен 100% қамтылған. Қалаларда ауыз сумен қамтудың ең төмен көресеткіші Жамбыл облысында – 91,9%, — деді министр.
Ал, ауылдық елді мекендерді ауызсумен қамту көрсеткіші Қостанай облысында – 80,4%, Ақмола облысында – 89,8% және Солтүстік Қазақстан облысында – 85% болып тұр.
— Қамту көрсеткіштері төмен өңірлерге қаражат басым негізде бөлінеді, бұл өз кезегінде артта қалған өңірлердің деңгейін арттыруға мүмкіндік береді, — деді Марат Қарабаев.
