СҚО-да көпбалалы үш полицей халықаралық отбасы күніне орай марапатталды, деп хабарлайды Qyzyljarnews.kz тілшісі.
Халықаралық отбасы күнінде «Міндет. Абырой. Ерлік» атты облыстық көркемөнерпаздар байқауының қорытындысы жарияланды. Салтанатты шарада жеңімпаздардың есімдері белгілі болып, отбасы институтын нығайту, некенің ұлттық құндылықтарын насихаттау, өскелең ұрпақты рухани-адамгершілік тұрғысында тәрбиелеу мақсатында Петропавл қаласы ПБ-ның 3 қызметкері Алғыс хатпен марапатталды.
Патрульдік полиция батальоны қызметінің аға инспекторы Талғат Исмағамбетов, учаскелік инспектор Жасур Ильхомов, аға анықтаушы Гүлсім Гарипова – құқық қорғау қызметін атқарып қана қоймай, әрқайсысы төрт баланы тәрбиелеп отыр.
— Бүгінгі таңда біздің облыста полиция қызметкерлері 71 отбасы құрайды, онда ерлі-зайыптылардың екеуі де полицияда қызмет етуде. Біз өз үлгісімен отбасылық құндылықтарды насихаттайтын, өскелең ұрпақтың қызметі мен тәрбиесін біріктіретін адамдарды мақтан тұтамыз. Адамның болашақ мінез-құлқы мен қоғамдағы орны отбасының тәрбиесі мен дәстүрлеріне, руханиятына байланысты, – дейді СҚО ПД бастығы Айдын Қабдұлдинов.
