Келер жылдан бастап өңір тұрғындары Петропавлдан шетелге ұшу мүмкіндігіне ие болмақ. Бұл туралы орталық коммуникациялар қызметінің баспасөз мәслихатында облыс әкімі Айдарбек Сапаров мәлім етті, деп хабарлайды Qyzyljarnews.kz тілшісі.
Өткен жылы Петропавл халықаралық әуежайы сенімгерлік басқаруға берілгенін атап өткен жөн. Қажетті жөндеу жұмыстары жүргізіліп, кейбір мәселелер шешіле бастады. Әзірге облыстан шетелге қатынайтын рейстер жоқ.
— Әуежайға қатысты біраз мәселелер болды. Ол бастапқыда мемлекет меншігінде еді. Кейін сенімгерлік басқаруға беру туралы шешім қабылданды. Енді ақырындап, түйткілді сұрақтарға жауаптар табылуда. Қазір жалақыға қатысты проблема жоқ. Жөндеу жұмыстары жүргізіліп жатыр. Әуежайдың халықаралық мәртебесі бар. Олар қазір халықаралық рейстер бойынша келіссөздер жүргізілуде. Егер барлығы сәтті болса, келер жылдан тұрғындар шетелге шыға бастайды, — деді облыс әкімі.
