Облысқа жұмыс сапарымен ҚР Ақпарат және қоғамдық даму вице-министрі Евгений Кочетов келді. Елордалық мейман облыс тұрғындарымен халықпен кездесті, деп хабарлайды Qyzyljarnews.kz тілшісі.
Петропавлдағы С.Мұқанов атындағы облыстық ғылыми-әмбебап кітапханасында Евгений Кочетов халық алдында сөз сөйлеп, жастар саясаты мәселесіне тоқталды.
– Республика бойынша жұмыс істемейтін жастар көрсеткіші орташа алғанда 8 пайызды құрайды. Солтүстік Қазақстан облысында да еңбек етпейтін жастар жетерлік. Бүгінгі таңда ұл-қыздардың 8,5%-ы NEET санатында жатады. Облыста ауыл шаруашылығы саласында жұмыс істеуге мүмкіндік көп, деді Евгений Кочетов.
Кейін жиналған қауым вице-министрге толғандырған сұрақтарын қойды. Қалалықтарды отбасылық қарым-қатынас мәселесі алаңдатады. Сондықтан олар министрден отбасыларды қолдау орталықтарының тиімділігі жайлы сұрады.
Елімізде мұндай 70 ұйым бар екен. 2025 жылға дейін тағы 75 орталық ашу жоспарда бар. Яғни, алдағы уақытта республикада 145 мекеме болмақ.
