СҚО әкімі Айдарбек Сапаров коммуналдық кәсіпорындардың басшыларымен жедел кеңес өткізді. Облыс орталығында тұрғындар коммуналдық қызметтің жұмысына жиі шағымданады, деп хабарлайды Qyzyljarnews.kz тілшісі.
Әсіресе, су құбырлары, электр және жылу желілерін жөндегеннен кейін жолдар мен жаяу жүргіншілер жолы уақытында қалыпқа келтірілмейді. Өңір басшысы мұндай келеңсіздікке жол беруге болмайтынын және оны 10 күнде қалыпқа келтіру қажет екенін баса айтты. Айдарбек Сапаров коммуналдық кәсіпорындардың басшыларын өз учаскелерін жөндеуге жауапкершілікпен қарауға шақырды.
— Сондай-ақ жол және коммуналдық қызметтердің іс-қимылдарын үйлестіру керек. Петропавлда қазір көшелерге асфальт төсеу науқаны жүріп жатыр, 30-дан астам учаскеде жұмыстар жоспарланған. Тиісінше, коммуналдық мекемелер асфальт төселмес бұрын жөндеу жұмыстарын жүргізуі қажет. Бірлескен іс-шаралар жоспары болуы тиіс. Коммуналдық қызмет пен жол жөндеушілер бірлесіп, жүйелі жұмыс істеулері керек. Бұл мәселені бақылауда ұстауды Петропавл әкімі Серік Мұхамедиевке тапсырдым, — дейді Айдарбек Сапаров.
