Биыл СҚО-ның 80-нен астам азаматы ПД басшылығының жеке қабылдауында болды, деп хабарлайды Qyzyljarnews.kz тілшісі Polisia.kz сайтына сілтеме жасап.
Қоғамдық қауіпсіздікті қамтамасыз етудегі проблемалы сұрақтар, қылмыстық істерді тергеу барысы, полицияға қызметке орналасу – Солтүстік Қазақстан облысы полиция департаменті басшылығының қабылдауына келетін азаматтарды мазалаған негізгі мәселелер. Облыстық полиция ведомствосының басшысына жеке сұрақтармен аптасына екі рет, сәрсенбі және жұма күндері жүгінуге болады. Бұл үшін 8 (7152) 39-40-20, 39-41-63 телефон нөмірлері арқылы қабылдауға жазылу керек.
Кезекті кездесу “AMANAT” партиясының облыстық филиалында өтті. СҚО ПД бастығының міндетін атқарушы Қанат Айтбаев Петропавл тұрғынын қабылдады. Келуге себеп болған мәселе – көршілер мен қарт әйелдің арасындағы кикілжің. Тұрғынның сұрағы бақылауға алынып, қалалық полиция басшылығына тұрғындар арасында жиналыс өткізу және мәселені шешу туралы тапсырма берілді.
Жыл басынан СҚО ПД бастығы мен оның орынбасарлары 88 адамның мәселелерінің шешілуіне көмектесті. Бұл – полицияның ашықтығы мен қолжетімділігінің қағидаттарын іске асырудың негізгі нысаны, жұмыстың сервистік моделінің түпкі нәтижесі.
