Облыс орталығындағы «Qyzyljar» арт орталығы тұрғындарды тағы бір тамаша шарамен қуантты. Түрлі көрмелер мен қолөнер бұйымдарының жәрмеңкелері жиі өтетін орында қаладағы кесте тігу шеберлерінің бұйымдары қойылды, деп хабарлайды Qyzyljarnews.kz тілшісі.
Жібектей нәзік ақ жіптен дөңгеленіп тігілген 50 кесте жұрт назарына ұсынылды. Көрмедегі әр бұйым ерекше.
– Бұл – біздің алғашқы жобамыз. Қасыма түрлі салада еңбек етіп жүргенімен тоқыма өнерін ермек еткен 17 адамды жинап, олардың жұмысын үйлестірдім. Барлық жұмысты ақ жіптен тоқыдық. Өрнек арқылы бір түсті түрлендіріп көрсетуге болады. Адам өмірі кесте сияқты. Әр адам өмірінің өрнегін өзі салады, – дейді жоба жетекшісі Галина Гусакова.
Орталықтағы кестелер топтамасының маңында естелік суретке түсіп жатқан жандар да өте көп. Қолөнер шеберлері егер бұл салаға бейімі бар тұрғындар болса, білгенін үйретіп, қатарларына қосуға дайын.
