Тайынша ауданында «Дала күні» өтті. Өңір диқандарын біріктірген шара «Астық СТЕМ» жауапкершілігі шектеулі серіктестігінің танап басында ұйымдастырылды, деп хабарлайды Qyzyljarnews.kz тілшісі.
Іс-шараны кіріспе сөзбен ашқан облыс әкімінің бірінші орынбасары Марат Тасмағанбетов «балапанды күзде санар» маусымының маңыздылығын атап өтті.
— Ораққа дайындықты тексеру, айтылатын ұсыныс-пікірлер мен өтініштер негізінде қордаланған проблемаларды бірлесіп шешудің оңтайлы жолдарын қарастыру жылдағы дәстүрге айналған. Облыста азық-түлік қауіпсіздігін қамтамасыз етуге және ішкі нарық үшін әлеуметтік маңызы бар дақылдарды көптеп өсіруге, астық өндірісін әртараптандыруға барынша басымдық беріліп отыр. Биыл қарақұмық алқабы — 2,5 есе, картоп 1,5 есе, жасымық 115,3 мың, күнбағыс 131 мың, қыша 13 мың гектарға ұлғайтылды. Топырақ құнарлылығын арттыру мақсатында 2,3 млн. гектар жерге 174,5 мың тонна минералды тыңайтқыш енгізілді, — деді Марат Иманбайұлы.
«Қазақстанда астық дақылдарын өсіру» тақырыбында өткен семинар барысында аграршылар іс-тәжірибе алмасып, жергілікті егіншілік технологиясымен танысты, кәсіби қарым-қатынас төңірегінде ойларын ортаға салды. Ауыл шаруашылығы техникаларының басты жетістіктері мен озық әдіс-тәсілдердің артылықшылықтары паш етілді.
