Петропавлда қыркүйек айында автобус бағыттары жайында ақпарат беретін электронды таблолар іске қосылады, деп хабарлайды Qyzyljarnews.kz тілшісі.
Облыс орталығындағы электронды таблолар осыдан бес жыл бұрын сатып алынған болатын. Өкінішке қарай, істен шыққан құрылғылар осы күнге дейін жөнделмеген. Биыл орайы түсіп, қалалық әкімдіктің мамандары оларды іске қосуды жөн көрді.
Петропавл қаласы әкімінің орынбасары Әділбек Әубәкіровтың айтуынша, облыс орталығында жазда «Infobus» жүйесі қайта енгізілді. Бұған қоса 31 электронды табло жөнделді.
— Жоспарда жолаушылар ағынын анықтау үшін арнайы датчиктерді орнату бар. Оның көмегімен жолаушы тасымалдаушылар қаншалықты ашық жұмыс істеп жатқанын көре аламыз. Бұған қалалық бюджеттен қаражат бөлінді, құрылғыларды жаңа автобустарға орнатамыз, — деді Әділбек Әубәкіров.
Өткен жылы жолаушы тасымалына қала бюджетінен 2 млрд. теңгеден астам субсидия бөлінді. Биыл оның көлемі 3 млрд. теңгеге жетті.
Биыл Петропавлға жаңа 11 автобус алынды. Қазіргі уақытта облыс орталығындағы қоғамдық көліктердің 58% — жаңа.
