Биыл Уәлиханов ауданының жолдарын жөндеуге облыстық бюджеттен 494 млн. теңге қаржы бөлініп, жолдар қалпына келтіріле бастады. Тапсырысты орындауды қолға алған мердігер – қызылордалық «Сапақ» компаниясы, деп хабарлайды Qyzyljarnews.kz тілшісі.
Кішкенекөл ауылында барлығы 27 көше болса, соның сегізіне қиыршық тас төселген. Ауылдағы ең ұзын Жамбыл көшесі екі шақырымды құрайды. Оны жөндеуге жиырмаға жуық адам мен он бес бірлік техника жұмылдырылған.
– Жобаға бағытталған қаржының 74 млн. теңгесі игерілді. Жоспарлы жұмыс қазан айынның соңына дейін аяқталуы тиіс. Ауа райы қолайсыздық тудырмаса, жұмыс қарқынын бәсеңдетпейміз, – дейді мердігер кәсіпорын өкілі Мырзабек Ділімбетов.
Алты мыңнан астам адам тұратын Кішкенекөл ауылында екі мыңға жуық шаңырақ бар. Ауыл ішіндегі барлық жолдың ұзындығы 22 шақырымды құрайды. Қазіргі таңда 16,4 шақырымға қиыршық тас төселіп, жөнге келтірілген. Жолдар толық жөнделген соң, жол белгілері орнатылады.
