Облыс орталығындағы Универсальная көшесінде темір жол арқылы өтетін автожол өткелінің құрылысы басталды, деп хабарлайды Qyzyljarnews.kz тілшісі.
Облыс әкімі Ғауез Нұрмұхамбетов қаланың құрылыс нысандарын аралады. Өңір басшысы Универсальная көшесінде салынып жатқан автожол өткелімен танысты.
Жаңа жол өткелдің арқасында Петропавлдағы көлік ағыны жеңілдей түседі. Кейін Ғауез Нұрмұхамбетов облыс орталығында тұрғызылып жатқан жеке тұрғын үйлерге тартылып жатқан инфрақұрылым желілерін көрді.
Жаңа «Солнечный 2» және «Южный» шағын аудандарында жеке тұрғын үй құрылысына арналған инженерлік желілерді тарту жұмыстары жүргізілуде. Жалпы кезекте тұрғандарға жеке баспана салу үшін 3 мың тегін жер телімі беріледі. Сонымен қатар, өңір басшысы спорт нысандарының жұмысымен де танысты. «Қарасай» стадионын қайта жөндеудің бірінші кезеңі аяқталуға жақын. Жылыту және автосуару жүйесі бар жаңа футбол алаңы, жарықтандыру, электронды табло мен дыбыс жабдығы орнатылды. Жобаның екінші кезеңінде трибуналар мен оның астындағы үй-жайларды жаңарту жоспарлануда.
