Сібір жарасы – жануарлар мен адамдар үшін аса қауіпті жұқпалы кесел. Өңірде эпидемиологиялық ахуал тұрақты болғанымен, сақтандыру жұмыстарын күшейтпей болмайды. Өйткені оның тарауының ықтималдығы жоғары ошақтары аз емес. Бұл туралы облыс әкімінің бірінші орынбасары Марат Тасмағамбетов қатысқан жиында айтылды, деп хабарлайды Qyzyljarnews.kz тілшісі.
Шарада облыстық сыбайлас жемқорлыққа қарсы іс-қимыл департаментінің мамандары сібір жарасы көмінділері тізілімін цифрландыруды ұсынды. Ведомоство басшысы Асхат Жақыпбеков талдау жұмыстары барысында сібір жарасы көмінділеріне басты назар аударылғанын, өйткені үй жануарларына қатысты түрлі аурулардан ауыл шаруашылығы тауарын өндірушілерді, ел халқын қорғау өте өзекті мәселе екенін атап өтті.
Департамент бірқатар проблемаларды, оның ішінде заңнамадағы олқылықтарды, облыстық деңгейде уәкілетті бақылаушы мемлекеттік органның, сондай-ақ осы саланы қаржыландырудың жоқтығын анықтаған.
Талқылау нәтижелері бойынша өңір аумағында сібір жарасының өршуіне жол бермеу мақсатында нақты мемлекеттік органға сібір жарасы көмінділерін күтіп-ұстау жөніндегі функцияларды беру, ветеринарлық талаптарға сәйкес, олардың техникалық жай-күйін жақсарту үшін 2024 жылға арналған қаражат қарастыру, сондай-ақ халықты ақпараттандыру және қоғамдық бақылауды күшейту үшін жер учаскелерін мемлекеттік есепке алу негізінде ақпараттық жүйеде «Сібір жарасы көмінділері картасы» жеке бөлімін құру мүмкіндіктерін қарастыру ұсынылды.
