Петропавлдағы көпқабатты үйлердің бірінен өрт шығып, қызыл жалынды ауыздықтауға 4 бірлік техника жұмылдырылды, деп хабарлайды Qyzyljarnews.kz тілшісі.
СҚО ТЖД баспасөз қызметінің мәліметінше, кеше кешкі сағат 20:20-да «101» пультіне Алтынсарин көшесі, 231/1 мекенжайында бес қабатты үйдің 1-ші қабатында орналасқан 2 бөлмелі пәтерден өрт шыққаны туралы ақпарат түсті. Оқиға орнына жедел түрде өртсөндірушілер жіберілді.
– Пәтерде тұрғындардың жеке заттары жанып кетті. Қызыл жалыннан 10 адам құтқарылды. Оның 4-уі бала. Сондай-ақ көпқабатты баспананың 20 тұрғыны қауіпсіз жерге шығарылды. 1964 жылғы ер азамат көміртегі тотығымен улану белгілерімен ауруханаға жатқызылды. От сағат 21:00-де ауыздықталды, — дейді СҚО ТЖД баспасөз қызметі.
Өрттің шарпыған ауданы 7 шаршы метр, қазіргі күні материалдық шығын көлемі анықталып жатыр.
