«Бидайық» автомобильдерді өткізу пунктінде пилоттық жоба іске қосылды

CarGoRuqsat электронды кезегі Ресеймен шекарада көліктердің бір уақытта жиналып, кептелісті болдырмау, осылайша жұрттың уақытын үнемдеу үшін енгізілді.

— Жүк тасымалдаушылар жаңашылдық туралы алдын ала ақпараттандырылды. Жеңіл автомобильдер мен автобустарға кезекті брондау қажет емес. Қазақстаннан шыққан кезде адамдардың, көлік құралдарының, жүк пен тауарлардың өткізу пунктінің аумағына кіру тәртібін Мемлекеттік кірістер органдары әкімші кабинеті арқылы бақылайды. Ал үкіметаралық келісімдер негізінде жануарларды, ауыр салмақты, тез бұзылатын және қауіпті жүктерді тасымалдайтын жүк көліктері, ҚР экспорттық әлеуетін дамыту мақсатында экспортқа арналған тауарлар, инвестициялық жобалар мен мемлекеттік тапсырыстарды іске асыру аясында жол жүру құқығы бар пошта операторлары, заңды және жеке тұлғалар және жедел өту үшін төлем жасағандар кезектен тыс шекарадан өте алады, — дейді СҚО бойынша мемлекеттік кірістер департаменті басшысының орынбасары Дамир Нұрғалиев.

Электрондық кезекке сайт немесе мобильді қосымша арқылы тіркелуге болады. Бірақ ол үшін электронды-цифрлық қолтаңба қажет. Бағдарлама мемлекеттік мәліметтер базасымен байланысты, сондықтан автоматты түрде брондау кезеңінде көлік жүргізушіде сақтандыру полисі, тасымалдауға рұқсат, көлікке, сондай-ақ жүргізушіге іздеу жарияланбағандығы, ақылы жолдар бойынша берешек және басқа да ақпарат тексеріледі.

— Төлем тіркеушінің есеп шотына қолма-қол немесе қолма-қол ақшасыз жасалады. Автомобиль көліктерін, жүкті және тауарды мемлекеттік шекара арқылы өткізу, сондай-ақ олардың электрондық кезек бойынша өту төлемақы мөлшері Қаржы министрінің бұйрығына сәйкес айқындалады, — дейді Дамир Нұрғалиев.

Егер жүк көлігі брондауға сәйкес сол күні, сол сағатта шекарадан өтпесе, электрондық кезектің күші жойылады.