Облыс әкімі Ғауез Нұрмұхамбетов итальяндық «PROSOL» компаниясының басқарушы директоры Даниэле Бонвичинимен кездесті, деп хабарлайды Qyzyljarnews.kz тілшісі.
Өңір басшысы итальяндық компанияның басқарушы басшысымен алдағы перспективалы инвестжобаны жүзеге асыру жоспарын талқылады. Биыл қараша айында шетелдік инвестор «Qyzyljar» арнайы экономикалық аймағының қатысушысы атанды.
Итальяндық компания Петропавлда азықтық ашытқы шығаратын зауыт салуды жоспарлап отыр. Оны құрама жем өндірісінде және мал азығы рационында биоқоспа ретінде пайдаланады екен.
– Бұл өнімнің түрі біздің аграрлық аймаққа қажет-ақ. Жобаға тартылған инвестиция көлемі 1,5 млрд. теңгені құрайды. Тың зауыттың ашылуымен 40 жаңа жұмыс орны пайда болды, — деп жазды әлеуметтік желідегі жеке парақшасында СҚО әкімі Ғауез Нұрмұхамбетов.
