Облыста қызылшаны жұқтырудың 75 дерегі тіркелсе, оның 68 фактісі Петропавлда анықталды, деп хабарлайды Qyzyljarnews.kz тілшісі.
СҚО санитарлық-эпидемиологиялық бақылау департаментінің мәліметінше, қызылшаның расталған жағдайларының ішінде Біріккен Араб Әмірліктерінен, Ресейден және Қырғызстаннан жеткізілген 3 факті тіркелді. Шалдыққандардың 49-ы – 15 жастан асқан азаматтар. 14 жасқа дейінгі балалар арасында 26 жағдай белгілі.
– Қызылшаны жұқтырғандардың 79 пайызы вакцинацияланбаған. Олардың саны 59 жетіп отыр. Әлеуметтік-кәсіптік құрылым бойынша жағдайлардың ең көп дерегі әскери академияның қызметшілерінде тіркелді. Бүгіндері 29 жағдай сараптамадан соң расталды, — дейді СҚО санитарлық-эпидемиологиялық бақылау департаментінің басшысы Әсет Жұматаев.
Облыста қызылшаға қарсы қосымша жаппай иммундау барысында екпені 3540 бала, 86 медицина қызметкері алды.
Вакциналар туралы ақпаратты тұрғындар EGU.kz сайтынан таба алады немесе 7701 сенім телефоны бойынша біле алады.
